निजी ल्याबलाई पत्याएन बीमा समितिले, कोरोना बीमामा अर्को परिवर्तन

September 4, 2020 मा प्रकाशित (६ महिना अघि) अनुमानित पढ्ने समय : १ मिनेट

भदौं, काठमाडौं । निजी प्रयोगशालामा कोरोना भाइरसको परिक्षण गराउँदा पोजेटिभ देखिएमा अब कोरोना बीमा गरेकाहरुले सोको आधारमा दाबी भुक्तानी नपाउने भएका छन् । बीमा समितिले बिहिबार बीमा समितिको नाममा जारी गरेको सर्कुलरमा  निजी ल्याबमा गरेको परीक्षणबाट पोजेटिभ देखिएमा भुक्तानी नगर्न बिमा कम्पनीहरुलाई निर्देशन गरेको हो ।

निर्देशनमा भनिएको छ, ‘कोभिडको दाबी भुक्तानी दिँदा स्वास्थ्य मन्त्रालय अन्तर्गतका ल्याब तथा अस्पतालमा भएको परीक्षण रिपोर्टका आधारमा मात्रै दिनू होला ।’

बीमा समितिका कार्यकारी निर्देशक राजुरमन पौडेलले कोरोना बीमा क्लेममा आशंका देखिएपछि सो सर्कुलर जारी गरिएको बताए । उनले निजि ल्याबमा परिक्षण गराएर कोरोना पोजेटिभ देखिएको रिपोर्टमा शंका गर्ने ठाउँ भटिएकोले यस्तो गरिएको बताए ।

उनले भने, ‘अहिलेसम्म ९ लाख ४ हजार २३७ जनाले कोरोना बीमा गरेका छन् । सोमध्ये ५० हजारको बीमाकं गर्ने ३६ जनाले दाबी भुक्तानी लिइसकेका छन् भने एक लाख बिमाकं रकम भएकाले २१३ जनाले भुक्तानी लिइसके ।’

त्यस्तै उनले ५० हजार बीमाकं रकममा १२९ वटा दाबीको भुक्तानी हुन बाँकी छ भने एक लाख बीमाकंको एक हजार ९८ जनाको भुक्तानी हुन बाँकी रहेको बताए । बैशाखबाट शुरु भएको कोरोना बीमा पोलीसीबाट ५३ करोड ५८ लाख ३८२ रुपैयाँ प्रिमियम संकलन भइसकेको पौडेलले बताए ।@insurencekhabar