जापानले लगाएको आपतकाल मार्च ७ सम्म लम्ब्याउने, तोचिगी भने सूचिबाट हटाइने ओकिनावालाई थपिने

February 2, 2021 मा प्रकाशित (४ हफ्ता अघि) अनुमानित पढ्ने समय : ३ मिनेट

माघ, टोकियो । जापानले सरकारले कोरोना भाइरसको संक्रमण नियन्त्रण गर्न टोकियो र अन्य १० प्रिफेक्चरमा लगाएको आपतकाल मार्च ७ सम्म लम्ब्याउने भएको छ । गम्भीर प्रकृतिका कोभिड–१९ का बिरामीको संख्यामा भएको वृद्धिका कारण स्वास्थ्य संस्थाहरु माथिको चाप बढिरहेकोले सरकारले मंगलबार आपतकाल लम्ब्याउन लागेको हो ।
प्रधानमन्त्री योशिहिदे सुगाले यससम्बन्धी अन्तिम निर्णय विज्ञहरुको समितिको धारणा सुनेपछि गर्नेछन् । टोकियो र आसपासका तीन प्रिफेक्चर खानागावा, चिबा र साइतामाका साथै आइची, गिफु, ओसाका, क्योतो, ह्योगो र फुकुओकामा पनि आपतकाल यथावत् रहने अपेक्षा गरिएको माइनिचीले यस मामिलाबारे जानकार स्रोतको भनाई उद्धृत गर्दै एक समाचारमा भनेको छ । कोरोना भाइरसको संक्रमणमा उल्लेख्य सुधार आएकोले तोचिगीलाई भने सूचिबाट हटाएर ओकिनावालाई थपिने भएको छ ।
विज्ञहरुको समितिसँगको छलफलपछि सुगाले आपतकाल लम्ब्याउने विषयमा संसदमा स्पष्टिकरण दिने छन् । त्यसपछि सरकारको कोभिड–१९ कार्यदलको बैठकमा यसबारे निर्णय गरिनेछ अनि साँझमा भने पत्रकार सम्मेलन गरिने बताइएको छ । सरकारले घरमै बस्न अनुरोध गरेको भएपनि टोकियोको गिन्जा क्षेत्रको बारमा गएका सत्तारुढ गठबन्धनका सदस्यहरुको कदमबारे सुगाले जवाफ दिन अनुमान समेत गरिएको छ ।
यस का’न्डमा सुगाको लिबरल डेमोक्रेटिक दलका तीन जना कानून निर्माताहरुलाई पार्टीबाट निस्कासन गरिएको छ । कनिष्ठ गठबन्धन कोमेइतोका एक कानून निर्माताले भने संसदबाट राजिनामा दिएका छन् । जनवरी ७ मा सुगाले टोकियो र आसपासका क्षेत्रमा आपतकाल घोषणा गरेका थिए । जनवरी १३ मा यो सूचिमा ओसाका लगायत अन्य ७ प्रिफेक्चरलाई थपियो ।

संक्रमण नियन्त्रण कानूनमा अधिकारीहरुको अनुरोधको वेवास्ता गर्नेलाई द’ण्ड सजाय छैन । त्यसैले सरकारले कानूनलाई संसोधन गरेर अस्पतालमा भर्ती हुन नमान्ने बिरामी र चाँडै व्यवसाय बन्द गर्न नमान्ने रेस्टुरेन्ट र बारहरुलाई जरिवाना तोक्ने प्रस्ताव ल्याएको थियो । तर पछि सो व्यवस्था हटाउन सहमति प्रमुख दलहरुबीच भयो ।
सोमबार संक्रामक रोग नियन्त्रण सम्बन्धी विशेष कानूनमा संसोधन विधेयक प्रतिनिधि सभाले पारित गरिसकेको छ । हाउस अफ काउन्सिलर्सले यसलाई अनुमति दिएपछि बुधवार सो विधेयक कानून बन्ने अपेक्षा गरिएको छ ।